Wednesday, 25 November 2020

ചെകുത്താൻ്റെ വോട്ട്

നാളെ ചെകുത്താനോട്
വോട്ടു ചോദിക്കാൻ പോണം
ഒരു വോട്ടല്ലേ
അതെങ്കനെ കളയും
ദൈവം ചിന്തിച്ചു....

ആള് ഭയങ്കരനാ
നീച്ചനും ക്രൂരനും
പാപജന്മവുമാണ്
ഇന്നലെ പാടിയതും
അകറ്റിയതും
ഓടിച്ചതും
ഒരു പുഞ്ചിരിയിൽ
മായ്ച്ച് ....
ഒരു തൊഴുകൈയാലെ
കൈകഴുകി ചെല്ലണം

പക്ഷേ എന്തു വാഗ്ദാനം
കരുതണം.....
ഒരു അമ്പലമായാലോ
ഒരു അറവുശാലയായാലോ
ഒരു ഗുണ്ടാസംഘമായാലോ
അതോ .....
എന്തായിരിക്കും
പ്രതിക്ഷിക്കുക

ദൈവമേ....
ഇലക്ഷനാണ്
കാലം തെറ്റിയും
മഴ പെയ്യും
എന്തു പറഞ്ഞാലും
ഒരു വോട്ടാണ്
ഞാൻ ജയിച്ചില്ലങ്കിലോ
ദൈവം രാത്രി മുഴുവൻ
ചിന്തയുടെ തിരി നീക്കി
എണ്ണയൊഴിച്ച്
രാത്രിയെ ഇറക്കി വിട്ടു

നാലാം ദിവസത്തെ
പ്രചരണം
ദൈവം വോട്ടു ചോദിച്ചിറങ്ങി
ചെകുത്താൻ്റെ വീട്ടിലേയ്ക്ക്
ഒരു റമ്മിൻ്റെ കഴിഞ്ഞു വെട്ടി
പ്രാതലിൻ്റെ പാത്രം നക്കി
ഉമ്മറത്തെ പരമ്പിലിരുന്ന്
വെറ്റിലത്തുമ്പു നുള്ളുമ്പോൾ
അതാ വരുന്നു.... ദൈവം
ചെകുത്താൻ അട്ടഹസിച്ചു
"വോട്ടു ചോദിച്ച്
നീയെൻ്റെ മുറ്റത്തോ"
ദൈവം ചിരി മങ്ങാതെ
തൊഴുകൈ മാറാതെ
വോട്ടിനായി കിതച്ചു
"ജനാധിപത്യത്തിൻ്റെ
ജാതകം കൊള്ളാം ആട്ടെ
നിൻ്റെ വാഗ്ദാനമെന്താ?"
ദൈവം ഉള്ളിലെ നടുങ്ങൽ
മുഖത്തു തെളിയാതെ ചിരിച്ചു
"എന്തു വേണം"
ചെകുത്താൻ ദേഷ്യത്താൽ ചുവന്നു
" നീയാണോ ദൈവം
വോട്ടു തേടുന്ന പുണ്യം
പോടാ പ്പോ....."
ഇറങ്ങും മുമ്പു
ദൈവം പറഞ്ഞു
"എൻ്റെ ചിഹ്നം
അറിയാമല്ലോ"
"അമ്പും വില്ലും"
ചെകുത്താൻ മുറ്റത്തേയ്ക്ക്
കാർക്കിച്ചു തുപ്പി.

No comments:

Post a comment